இளங்கன்று
அந்தக்
கன்றுக்குட்டி நிச்சயமாக நடிக்கவில்லை
வெறுந்தரையை
உற்றுநோக்குகிறது..
சுரக்காத
காம்பினை முட்டிக் கொள்கிறது
பசுவின்
சிறுநீரில் நனைந்து கொள்கிறது
சானமிட்டதும்
வெறித்துப் பார்க்கிறது
வைக்கோலைத்
தானும் சாப்பிடுவதுபோல் பாசாங்கு காட்டுகிறது
துள்ளிக்
குதித்துப் பிறகு திரும்பி விடுகிறது
பசுக்கயிற்றை
அவிழ்க்க வரும்
கிழவியைக்
கெட்ட வார்த்தை பேசவைக்கிறது
பசுவுடன்
நடந்து சென்று வெறித்துப்போய் வீடு வருகிறது
வாய்க்கூடு
போட்டாலும் நாய்ப்பீயை மோந்து பார்க்கிறது
வாலை
ஆட்டியாட்டிக் கிண்டல் புரிகிறது
கழுவ
வைத்திருந்த பாத்திரங்களை உருட்டிச் செல்கிறது
நிச்சயமாக
அது நடிக்கவில்லை
திண்ணையில்
உட்கார்ந்திருக்கும் எனக்கும்
தொழுவத்தில்
நின்றுகொண்டிருக்கும் பசுவிற்கும்
ஏதோ
சொல்ல ஆசைப்படுகிறது
அதுவரை
நாங்கள் அசைபோட்டுக் கொண்டிருக்கிறோம்..
0 கருத்துகள்: