செங்கழனிக் கோழி

ஆசையாய் வளர்த்த பெட்டைக்கோழி
திடீர் விருந்தால்
மயிர்பறித்து மசாலாவானது

வாசனை மூக்கைத் துளைத்தாலும்
கொதிப்புச் சததம் நெஞ்சை வெடிக்கச் செய்தது

சோற்றில் கிடந்த ஈரல்
இதயத்தைக் கனக்கச் செய்தது

தட்டின் ஓரத்தில் கிடந்த கழுத்துப்பகுதி
எனது குரல்வளையை நெருக்கியது

சதைக்கறி அத்தனையும்
எனது தசைநார்களைக் கிழித்துக் கொண்டிருந்தன

வந்த விருந்தினன் கைகழுவி வாய்துடைத்தார்
நான் இன்னும்
சோற்றின் இடுக்குகளில்
என் கோழியைத் தேடிக்கொண்டிருக்கிறேன்